Natalana na subong nga adlaw, Abril 30, ang deadline sang franchise consolidation para sa public utility vehicles nga una na nga ginpahayag ni President Ferdinand ‘Bongbong’ Marcos, Jr. nga wala na sang ihatag nga isa pa ka extension.
Ang consolidation ang naga-require sa public utility vehicles nga magsulod sa mga kooperatiba kag korporasyon agud nga maka-access sa business financing para makabataton sang modern jeepney units.
Kabahin ini sang PUV modernization program sang gobyerno nga ginsuguran sang 2017.
Ini nga programa ang nagatuyo nga maislan ang traditional jeepneys sang modernized units nga may at least Euro 4-compliant engine agud nga mabuhinan ang polusyon kag maislan ang indi na roadworthy nga mga jeep nga wala na nagalab-ot sa standards sang Land Transportation Office.
Pananglitan indi makahingabot sa pag-consolidate subong nga adlaw, iga-revoke ang prangkisa sang mga wala nagpati nga operators β buot silingon, ginadumilian na sila sa pag-operate bangud makabig na sila nga “colorum” kag kun madakpan, may penalidad nga idagdag.
Una nga gin-set ang deadline sang Disyembre 31, 2023, apang bangud sa kahangawa sa matabo nga transport crisis, una nga gin-aprubahan sang presidente ang rekomendasyon sang Department of Transportation nga sayluhon ang deadline subong nga adlaw.
Kahapon, Abril 29, liwat nga naghingyo sa Supreme Court ang transport group nga Pagkakaisa ng mga Samahan ng Tsuper at Operators Nationwide (PISTON) kag mga kaalyado nga organisasyon agud nga untaton ang gobyerno sa pagpatuman sa April 30 deadline.
Isa ini ka supplemental petition nga may urgent reiterative motion nga mag-isyu ang korte suprema sang temporary restraining order kag/ukon writ of preliminary injunction.
Matandaan nga may nauna na nga petition ang mga jeepney drivers kag operators nga ipauntat ang programa apang samtang wala pa sang desisyon ang Korte Suprema, una na nag-insister ang Department of Transportation nga dayunon sini ang ila kontrobersyal nga Public Utility Vehicle Modernization Program.#
