ILOILO CITY– Nagapati ang abyan sang ginpatay nga tricycle driver sa Boulevard, Molo, Iloilo City nga biktima lang ini sang sala nga pagpasibangod.
Ang biktima amo si Zaldimer Helliga, 47-anyos samtang ang suspek amo si Gerardo Tayco Sofia Jr., alyas “Bulldog”, kag lunsay residente sang nasambit nga barangay.
Sa interview sang Bombo Radyo kay alyas Ben, iya ginpahayag nga ginpasibangdan lang sang suspek ang biktima nga ini ang nanugid sa otoridad tuhoy sa involvement sang tiyo sang suspek sa pagbaligya sang iligal nga druga nga rason kun ngaa gindakop ini.
Suno kay alyas Ben, wala gid sang kahilabtanan ang biktima sa pagkaaresto sa tiyo sang suspek.
Ginhangkat man sini ang suspek nga magsungka sa otoridad kag atubangon ang konsekwensiya sang ginhimo sini nga krimen.
