ILOILO CITY – Nagapangabay si Iloilo City Mayor Jerry Treñas sa mga residente sang syudad sang Iloilo nga ipaiway anay ang non-essential travels sa kaiping nga mga lugar sa Rehiyon VI agud malikawan ang pagdala-dala sang COVID-19.
Ang non-essential nga travel nagapatuhoy sa mga byahe nga lagaw-lagaw lang kag indi para sa trabaho, negosyo, kag medical ukon humanitarian reasons.
Kun may yara gid sang magduso para sa non-essential travels, nag-abiso man ang alkalde nga sa pag-abot sa syudad sang Iloilo, mas maayo nga magpaidalom sa lima ka adlaw nga quarantine.
Sa advisory nga ginpagwa sang alkalde, ginaabisuhan man ang mga employers kag mga opisyal sang Iloilo City Government kag sang mga barangay nga i-monitor sang maayo ang mga returning residents and employees nga may sintomas sang balatian.
Sa interview sang Bombo Radyo kay Mayor Jerry Treñas, iya ginpahayag nga ang returning resident ukon employee naman ang dapat magmato-mato sa pag-self isolate kag pagpakig-angot sa local authorities kun may malain nga nabatyagan sa lawas.
Kun basehan ang Abril 21 nga rekord sang Department of Health (DOH) Region VI, ang Negros Occidental ang may pinakamataas nga active cases sa Western Visayas nga may 2,254.
Kun pahat-pahaton ang active cases sang iban nga mga lugar sa rehiyon:
Aklan – 211
Antique – 530
Capiz – 169
Guimaras – 13
Iloilo Province – 389
Bacolod City – 740Iloilo City – 294
Ang Western Visayas ang napaidalom sa Modified General Community Quarantine (MGCQ).
