Nagsabat ang Armed Forces of the Philippines (AFP) nga wala sini ginahatagan sang balor ang ginapanindugan sang China nga may “new model” arrangement ang Pilipinas kag China sa Ayungin Shoal kag may yara sila sang kopya sang audio recording nga makapamatuod sini.
Suno kay AFP chief of staff General Romeo Brawner, wala sang daku nga bug-at kag indi talalupangdon ang ginawangal sang China nga may audio recording sila sang gina-alegar nga istoryahanay nanday Vice Admiral Alberto Carlos kag isa ka Chinese diplomat.
Pahayag pa ni Brawner, mahapos nga pekeon ukon i-frabricate ang transcript samtang ang audio recording naman ang mahimo ma-manufacture gamit ang deep fakes.
“Transcripts can easily be fabricated, and audio recordings can be manufactured by using deep fakes,” suno kay Brawner.
Ginsulit pa sini nga ini nga reports ang ginagamit lamang bilang distraction sa agresibo nga aktwasyon sang Chinese Coast Guard (CCG) sa West Philippine Sea.
“The AFP remains to be a professional organization. We urge the public and the media to handle such reports with care and to avoid spreading unverified information that could further escalate tensions or mislead public opinion,” dugang pa sa statement.
Sa Beijing naman, ginsiling ni Chinese Ministry of Foreign Affairs spokesman Lin Jian nga maathag ang arrangement kag may ebidensya sila nga indi sarang mapanginwala.
Sa inisyal nga reports, may yara sang duha ka minutos nga recording sang phone call nga natabo sang Enero 2024 sa tunga sang Chinese side kag opisyal sang militar sa Pilipinas nga amo ang ginaalegar nga hepe sang AFP Western Command.
Sang amo nga tion, si Vice Admiral Carlos amo ang nagapungko sa posisyon.
Gin-report man nga may na-provide na nga transcript sa amo nga istoryahanay.
Nagsabat naman si Defense Secretary Gilberto Teodoro Jr. nga may salabton pananglitan matuod gid man nga may nag-record sang gina-alegar nga istoryahanay nga amo ang ginatudlo nga nag-leak.
Suno kay Teodoro, duha-duha man siya kun ano kamatuod ang audio recording, apang maga-imbestigar ang Department of Foreign Affairs (DFA) sa sini bangud isa ini ka paglapas sa wiretapping law.
“The authenticity of which I doubt, even the propensity of the Chinese government to engage in malign information activities. Ngayon, ito ang dapat nating tutukan at dapat intindihin ng ating mga kababayan,” suno sa tiglikom. “Ito ay iiwanan namin sa DFA na alamin ang katotohanan kung ano talaga ang nangyari at kung ito talaga ay nangyari dahil ito ay gawain di umano ng Chinese embassy mismo na paglabag sa batas ng Republika ng Pilipinas.”#
