Nagakahangawa ang Estados Unidos sa agresibo nga mga akto nga ginahimo sang China batok sa Taiwan nga amo ang ginatudlo nagapataas sang tensyon sa ginapanag-iyahan nga mga kadagatan.
Suno kay U.S. Secretary of State Antony Blinken, makabig nga isa ka seryoso nga sala para sa kay sin-o man ang pagtinguha sa pwersahan nga paglain sang status quo sa Western Pacific.
Una diri, ginbasol sang Beijing ang Estados Unidos sa nagakatabo nga tensyon matapos nga nagpalapit sa teritoryo sang Taiwan ang isa ka U.S. warship.
Suno kay Blinken, ang Estados Unidos naman ang may yara sang longstanding commitment sa idalom sang Taiwan Relations Act agud masigurado nga may kapasidad ang Taiwan nga depensahan ang kaugalingon nga lugar kag ipabilin ang kalinong kag seguridad sa Western Pacific.
Sang ginpamangkot naman kun magaresponde bala ang militar sang Estados Unidos batok sa ginahimo sang China sa Taiwan, wala man sang direkta nga sabat si Blinken apang ginpahayag niya nga may seryoso nga commitment ang Estados Unidos sa Taiwan agud madepensahan sini ang kaugalingon nga teritoryo.
Nahibaluan nga binulan na nga nagareklamo ang Taiwan bangud sang sulit-sulit nga misyon sang air force sang China malapit sa ila isla.
Sang Biyernes, nagpahayag ang White House nga ginabantayan sini ang pagdamo pa sang Chinese military activities sa Taiwan Strait.
