Nagpasalig si former Justice Secretary Vitaliano Aguirre II nga indi siya magpanago pananglitan nga may ipaguwa na nga arrest warrant ang International Criminal Court (ICC) batok sa iya.
Isa ang former justice official sa ginhingadlan nga co-perpetrator sa drug war ni former President Rodrigo Roa Duterte nga subong nagapangatubang sang kaso nga crimes against humanity sa korte sa The Hague, Netherlands.
Apisar indi siya magpanago suno kay Aguirre, magapamatok siya nga arestuhon, apang suno sa iya, himuon niya ini sa legal nga paagi, kaangay sang pagdangop sa korte bangud nagapati siya nga isa ka pagsupak sa layi pananglitan nga i-subject siya sa trial sa ICC.
Nagalaum man si Aguirre nga magpaguwa sang ruling ang Korte Suprema nga naga-athag sang proseso nga sundon pananglitan nga may arrest warrant halin sa amo nga korte.
Nagpanindugan man si Aguirre nga wala siya sang involvement sa ginasiling sang ICC nga “common plan” ukon “national network” sa implementasyon sang drug war.
Nagapati man ang anay opisyal nga gindugang lang siya sa listahan agud nga mapatihan ini ukon agud nga may kredibilidad ang kaso.
Pahayag sang anay DOJ Secretary, wala siya sang kahilabtanan sa anuman nga extrajudicial killings, kag sa pagkamatuod suno sa iya, nangin instrumento pa siya gani agud nga makuha sang pila ka drug war victims ang hustisya.
Magluwas kay Aguirre, yara sa listahan sang alleged co-perpetrators sanday:
Senator Bong Go
Senador Bato dela Rosa
Former PNP chief Vicente Danao
Ang nagtaliwan nga former PNP chief Camilo Cascolan
Former PNP chief Oscar Albayalde
Former National Bureau of Investigation (NBI) chief Dante Gierran
kag Former Philippine Drug Enforcement Agency chief Isidro Lapeña.
Una naman nga nagpahayag ang defense team ni Duterte sa pagpanguna ni Atty. Nicholas Kaufman nga wala pa sang arrest warrant sa sini nga mga indibidwal. Gintawag man ni Kaufman nga pamulitika ang pagpagwa sang listahan.#
