Natalana nga mag-abot sa Pilipinas subong nga adlaw ang Amir sang state of Qatar para sa isa ka state visit nga magalawig tubtub buwas, Abril 22.
Maragtason man ang pagbisita ni His Highness Sheikh Tamim bin Hamad Al Thani bangud ini ang una nga tion nga ang current amir ang magatapak sa Pilipinas kag makig-istorya sa presidente.
Mismo si President Ferdinand Marcos, Jr. ang nag-imbitar sa amir nga magkadto sa pungsod agud nga mas mapabaskog pa ang relasyon sang Pilipinas kag Qatar.
Lakip sa ginalauman nga maistoryahan amo ang conclusion sang agreements; trade kag investment; pagpasangkad sang mga area sang cooperation; kag pagtapna sang climate change kag human trafficking.
Ang masobra 20 ka agreements ang naga-cover sang investments, taxation, air services, labor, establishment sang political consultation mechanism, agriculture, amo man sa economic, commercial, kag technical cooperation.
Nahibaluan nga may 270,000 ka mga Pinoy sa nagkalain-lain nga industriya sa Qatar.#
