ILOILO CITY – Nag-plead nga guilty ang anak ni United States President Joe Biden nga si Hunter Biden sa duha ka charges sang indi pagbayad sang income taxes sa isa ka deal sa Justice Department.
Ang federal charges batuk kay Hunter Biden ang naggwa sa imbestigasyon ni David Weiss nga isa ka abogado sa Democratic state of Delaware nga gin-appoint ni Republican former President Donald Trump.
Suno sa deal, nagsulod ang bata nga Biden sa pretrial diversion agreement sa isa ka firearm offense.
Ang 53 anyos nga presidential son ang nangin target sang wala untat nga pagpang-atake ni Trump kag sang iya Republican allies nga gin-akusaran nga may kaangtanan sa Ukraine kag China.
Si Hunter ang nagtrabaho bilang isa ka lobbyist, abogado, investment banker kag artist, kag ginsapubliko ang inagyan sini sa substance abuse.
Sang 2020, ginbuyagyag niya nga naga-imbestigar ang opisina ni Weiss sa iya tax affairs kag ginpanginwala una ang amo nga akusasyon.
Sang 2021, si Hunter Biden ang ginpahayag nga nagagamit sang cocaine kag na-adik sa alcohol.
Siya ang na-discharge sa United States Navy reserve sang 2014 matapos nagpositibo sa paggamit sang cocaine.
Gin-imbestigaran una sang mga Weiss ang mga paglapas sini sa tax kag money laundering laws sa pila ka foreign business dealings, partikular na sa China.
Suno sa senior Republican congressman nga si James Comer, ginatago sang United States Treasury ang mga financial “suspicious activity reports” agud nga mahinabunan ang business dealings ni Hunter Biden.
Si Hunter Biden ang nagagwa nga pinakauna nga anak sang sitting president nga ma-indict suno kay Aaron Crawford nga naga-specialize sa presidential history sa University of Tennessee.
Suno kay Crawford, ang pamilya sang pila ka mga presidente nga na-angut sa eskandalo ang nagalakip sa anak ni George H.W. Bush nga si Neil sa failed savings and loan, kag ang utod ni Richard Nixon nga si Don nga na-rescue nagikan sa business failures sang manggaranon nga negosyante nga si Howard Hughes.
