Natigayon nga maaresto ang anay Overseas Filipino Worker (OFW) nga na-report nga nagapalupok kag nagapanaya sang armas luthang sa Brgy. Canabajan, Calinog, Iloilo.
Ini kasunod man sang pag-implementar sang search warrant ang Calinog Municipal Police Station sa kaso nga RA 9165 ukon Comprehensive Dangerous Drugs Act of 2002, 10591 sa paghupot sang armas luthang kag 9516 sa paghupot sang explosive device.
Ang subject sa amo nga search warrant amo si Ram, 34-anyos, residente sang nasambit nga Barangay.
Sa interview sang Bombo Radyo kay Police Major Myles Dieron, Hepe sang Calinog Municipal Police Station, iya ginpahayag nga natigayon ini nga maaresto bangud man sa mga impormasyon nga kun mahubog ini, dayon ini nagpantaya sang armas ukon nagapalupok.
Suno pa kay Dieron, yara man ini sa monitoring sang kapulisan nga ini ang nagaduso sang illegal nga droga.
Natigayon man nga ma-recover sa iya posisyon ang 120 ka gramo sang suspected shabu nga may standard drug price nga P816,000.
Wala naman ma-recover ang explosives sa iya paghinakop nga gin-identify sang confidential informant nga hand grenade.
Lakip man sa nakuha sang otoridad amo ang 12-gauge homemade shotgun sang subject.
