ILOILO CITY – Wala nadala sa manifesto ang personnel sang Bureau of Fire Protection Region 6 nga nag positibo sa Coronavirus Disease 2019 (COVID-19) sang nagpauli ini sa syudad sang Iloilo halin sa Cebu City.
Ang COVID-19 positive amo si WV 144, 26 anyos, babaye kag isa ka locally stranded individual.
Base sa chronology of events, Hunyo 5, 2020 sang nag-abot si WV 144 sa syudad sa diin wala siya na sugat sang local government unit apang ginsugat ini sang iya nga nobyo nga isa ka Fire Officer 1 kag isa ka Fire Inspector.
Gilayon nga gindala ang pasyente sa isa ka hotel kag nagtinir humalin Hunyo 5 tubtob Hunyo 8.
Samtang sang Hunyo 6 tubtob Hunyo 7, nagpadulong ang Fire Officer 1 kaupod ang anay Regional Director kag iban pa nga personnel sang ahensya sa Bayo Pequeño, Anini-y, Antique sa isa ka private beach house sa diin nag overnight ang mga ini, nag karaoke kag nag-inom sang makahulubog nga ilimnon.
Sa post sang isa ka netizen sa social media sang Hunyo 7, makit-an ang mga laragway sang mga personnel sang Bureau of Fire Protection Region 6 nga wala naga-obserba sang physical distancing kag wala man nagasuksok sang face mask.
Apang ang ini nga post sang netizen ang gin-delete na sa iya nga facebook account.
Wala makit-an sa picture ang Fire Officer 1 nga nagsugat sa COVID-19 positive apang suno sa imbestigasyon, yara ang iya presensya sa Anini-y, Antique.
Hunyo 8, ginsugat ang amo nga pasyente sa hotel sang iya kaupod sa trabaho kag ginsaylo ini sa BFP regional office kag nagtinir tubtob Hunyo 11.
Apang sang Hunyo 12, natukiban nga si WV 144 ang naka-upod kag nakatinir sa isa ka hotel sa Boracay kaupod ang mga personnel sang ahensya.
Samtang base naman sa official statement ni Iloilo City Mayor Jerry Treñas, may yara siya sang nabaton nga mga pictures sa diin ang mga empleyado sang City Hall ang nakit-an man nga kaupod ang Bureau of Fire Protection Region 6 sa private beach house sa Antique.
May yara sang lima tanan ka mga empleyado sang City Hall ang nakaupod sa Antique lakip na ang isa ka regular employee kag apat ka mga job orders.
Nakapasa na sang imbestigasyon ang City Zoning Office sa City Legal Office tuhoy diri.
Suno naman kay Jeck Conlu, myembro sang COVID-19 team sa syudad, wala naka-upod ang personnel sang BFP Region 6 nga nagpositibo sa Antique.
Indi mahimo nga i-lockdown ang City Planning Office sa diin ang lima ka mga empleyado nagatrabaho.
Samtang ang 28 ka mga personnel sang bureau of fire protection region 6 ang gin-relieve na sa pwesto sang dept of interior and local government.
