MANILA – Ginkumpirma ni Interior and Local Government Secretary Eduardo Año nga naglab-ot na sa 155 ka punong barangay kag mga opisyal sa Pilipinas ang gina-imbestigaran kag gintugyan sa Office of the Ombudsman may kaangtanan sa iregularidad sa pagpanagtag sang ayuda sa idalom sang Social Amelioration Program (SAP).
Sa taped briefing sang Inter-Agency Task Force on Emerging Infectious Diseases subong nga Biyernes, Hunyo 5, ginpahayag ni Año nga mas madamo na nga pumuluyo ang nag-report sang anomaliya bangud gina-post ang ngalan sang mga benepisyaryo sa mga barangay hall.
Nagpasalig man ang natungdan nga magapadayon ang pamunuan sa pagtumod sang mga lokal nga opisyal nga naga-abuso sa posisyon kag nadalahig sa korapsyon sang ayuda subong nga may coronavirus disease 2019 (COVID-19) pandemic.
Ginpahayag man ni Año nga nagahanda na subong ang gobyerno para sa distribution sang ikaduha nga hugnat sang SAP, samtang 99% naman nga natapos na ang una nga hugnat.
Napaidalom naman sa maid-id nga validation ang masobra apat ka milyon nga benepisyaryo sang second tranche.
