ILOILO CITY- Ginpang-terminate na sa ila trabaho ang anom ka mga empleyado sang City Engineer’s Office nga ginpasuni nangawat sang kable sang isa ka telecommunications company gamit pa ang salakyan sang city government.
Ini ang ginabug-usan sang isa ka Electrical Inspector II nga regular employee na sa sulod sang 13 ka tuig kag ang lima ka mga job hires nga tinuig na man sa trabaho.
Mismo si Iloilo City Mayor Jerry Treñas ang nagmando sang pagpahalin sa amo nga mga empleyado.
Una na ginpapili ni Mayor Treñas ang mga empleyado nga mag-resign ukon magpangatubang sang kaso.
Nagpaathag naman ang ginpahalin nga mga empleyado sang Iloilo City Engineers Office kag nanindugan nga wala sang natabo nga pagpangawat.
Sa interview naman sang Bombo Radyo kay Mr. Joel Gerasmia, Electrical Inspector II sang City Engineers’ Office kag Chief of staff sang nasambit nga talatapan, iya ginpahayag nga sang nasugilanon niya ang mga involved nga empleyado,ginsugid sang mga ini nga naagyan nila ang nagawayway nga kable gani ila ini ginhimos bangud nga nagasabad sa dalan.
Pahayag sang natungdan, ginbutang sang mga empleyado ang kable sa ila service vehicle kag ginbalabagan sila sang mga personnel sang amo nga telecommunications company.
Suno pa sa iya, sang ginpamangkot ang mga city hall employees tuhoy sa wire, gin- ako man nila nga ila ini sang telco kag gintanyag man nila nga ibilin na lang ang kable apan nagsiling ang personnel sang telco nga ipadala nalang.
Dugang sini, nakuhaan sang video sang personnel sang telco ang insidente kag nakibot na lang ang mga city hall employees nga ginpa-blotter sila.
Pahayag ni Gerasmia, kuntani wala nalang ginkuha sang mga empleyado ang kable bangud ang protocol amo nga ginahigot ini.
Plano naman sang ginpahalin nga regular employee nga mag- file sang iya counter affidavit angot sa insidente.
