Ginduso ni Sen. Cynthia Villar ang gilayon nga pagpasar sang hagna agud nga ma-address ang maka-alarma nga data sang obesity ukon tuman ka katambukon sa pungsod.
Suno sa senador, ang Senate Bill No. 2230 ukon ang ginaduso nga Anti-Obesity Act of 2023 ang nagatuyo nga maka-establisar sang kumprehensibo nga anti-obesity campaign agud makontrol kag malikawan sang mga Pinoy ang sobra nga katambukon.
Ginsaad sini nga 800 million ka mga indibidwal sa bilog nga kalibutan ang apektado sang obesity, kag nabutang sa mataas nga risgo sang cardiovascular diseases, diabetes, kag pila ka sahi sang cancer.
Sa Pilipinas naman, sandig sa data sang Department of Science and Technology – Food and Nutrition Research Institute, nagdangat sa 27 million ang numero sang overweight kag obese nga mga Pinoy.
Ginpaathag pa sang senador nga kun wala sang himuon nga proactive measures, padayon nga magasaka ang kaso sang overweight kag obesity kag posible magdangat sa masobra 30% sang Filipino adolescents nga overweight ukon obese sa 2030. Sa sini nga statement, gin-cite sini ang “Landscape Analysis on Overweight and Obesity in Children, Philippines.”
Nakasaad man sa sini nga hagna nga magtukod sang multi-sectoral committee nga pamunuan sang Department of Health agud mapatuman ang National Anti-Obesity Prevention and Control Program.
