ANTIQUE – Maga-upod si Antique Governor Rhodora Cadiao sa iban nga local chief executives sa Western Visayas sa paghingyo sang pagpalawig sang moratorium sa mga byahe halin sa NCR Plus, Cebu City kag Davao City.
Ang request para sa pagpalawig sang moratorium sang flights ang magaumpisa sa Abril 11 kag magalawig tubtob sa Abril 17.
Ang desisyon ni Cadiao ang kasunod sang COVID-19 surge nga narekord sa amo nga probinsya.
Santo sa Abril 8 nga record sang Antique Provincial Health Office, ang Antique ang may 409 nga kabug-usan nga kumpirmado nga kaso sang COVID-19, 10 ang reported deaths, kag 148 ang nag-ayo na.
251 sa sini nga numero ang active cases — malayo sa sitwasyon sang Antique sang nagligad nga mga binulan kag sa bilog nga tuig kun sa diin single digit lang anay ang ila nga daily cases.
Sa interview sang Bombo Radyo kay Cadiao, iya ginpahayag nga hingyuon man niya sa Antique Executive Committee nga samtang wala pa naganubo ang kaso sang COVID-19, magaugyon anay sila sa pagpanirado sa mga byahero nga halin sa mga lugar nga may mataas nga kaso sang amo nga balatian.
Una na nga ginpahayag ni Cadiao nga tag-isa tubtob tatlo lang ka kaso ang naandan nga nagadugang sa probinsya apang sang nagligad nga Marso 11, isa ka positive patient ang nag-intra sa bulang sa San Jose de Buenavista cockpit rason nga nalatnan man ang iban nga yara sa bulangan.
Nagpasalig man ang gobernador nga kun maghagan-hagan na ang sitwasyon, buksan naman liwat ang paluparan kag pantalan sa Antique.
