ANTIQUE – Ginkumpirma sang Antique Provincial Government nga naglab-ot na sa lima ang kaso sang Coronavirus Disease 2019 (COVID-19) sa Antique.
Ini matapos na-record ang tatlo ka bag-o nga positibo nga kaso kahapon nga adlaw, Abril 16.
Sa interview sang Bombo Radyo kay Governor Rhodora Cadiao, iya ginpahayag nga ang tatlo ka COVID-19 positive ang may close contact sa labing-una nga pasyente sang nasambit nga balatian sa Antique bangud sila ang lunsay nagatrabaho sa isa ka departamento sa Semirara Coal Corporation sa Brgy. Semirara, Semirara Island, Caluya.
Suno kay Cadiao, ulihi nga nag-abot ang swab test results sang una nga pasyente gani sang nag-ayo ini sa ginasuprer nga flu-like symptoms, nag-gwa ini kag nakaupod ang iya mga katrabaho.
Ang tatlo ka pasyente suno kay Cadiao ang lunsay residente sang Cebu City kag nag-abot sa nasambit nga isla sang Marso 12.
Sa subong, suno kay Cadiao, nagapabilin nga asymptomatic ang tatlo ka COVID-19 patients, yara sa estable nga kondisyon, kag nagapaidalom sa isolation sa Semirara Island.
Dugang pa sang gobernador, hugot ang koordinasyon sa tunga sang Antique Provincial Government kag sang local government unit sang Caluya agud matapna ang paglapta sang amo nga virus.
