Apat ka tawo ang patay kag madamo ang pilason sa panibag-o nga mass shooting nga natabo sa Alabama, USA.
Natabo ini kadungan sang 16th birthday party sa Mahogany Masterpiece Dance Studio sa Dadeville.
Suno kay Pastor Ben Hayes nga amo ang chaplain para sa Dadeville Police Department kag para sa local high school football team, teenagers ang kalabanan nga biktima.
Isa sa mga napatay suno sa iya amo ang isa sa star athletes sang amo nga high school football team.
Indi pa maathag kun ano ang motibo sa amo nga krimen ukon kun naka-kustodiya na ang suspek ukon mga suspek.
Ini nga insidente sa Alabama ang kasunod man sang isa ka pa shooting incident nga natabo sa kaangay man nga adlaw sa Louisville, Kentucky kun sa diin duha ang patay kag apat ang pilason.
Masobra na sa 140 ka mass shootings ang natabo sa Estados Unidos sang Amerika subong nga tuig.
