Patay ang apat ka mga soldado sa ambush nga ginpahayag kahimuan sang Dawlah Islamiya terrorists sa Maguindanao del Sur.
Tatlo sa mga biktima ang halin sa 40th Infantry Battalion samtang ang ikaapat naman ang nagikan sa 3rd Army Cavalry nga lunsay napaidalom sa 601st Infantry Brigade sang Philippine Army.
Ini ang ginabug-usan sang duha ka privates, isa ka private first class, kag isa ka corporal.
Sa inisyal nga impormasyon nga ginpaguwa sang militar, natabo ang pagpang-atake samtang sakay ang mga biktima sa civilian vehicle samtang pakadto sa ila nga patrol base sa Tuayan 1, Datu Hoffer, Maguindanao del Sur.
Ginpahayag nga antes ang insidente, nagbakal pa ang amo nga mga soldado sang pagkaon para sa Iftar sa Muslim community nga amo ang ila masami nga ginahimo sa kada Ramadan.
Sunod nga ginkondena sang 6th Infantry Division ang pagpang-atake ilabi na bangud ginhimo ini samtang yara sa Ramadan season kag antes man ang Semana Santa.
Ginpahugot na ang security operations sa lugar samtang padayon nga gina-ayam ang mga suspek.
Mismo si Brig. Gen. Oriel Pangcog, 601Bde commander, ang nagpahayag nga ang Dawlah Islamiya extremists ang posible utok sang nasambit nga ambush.
Matandaan nga sang Disyembre 2, 2023, 11 ka mga myembro sang amo nga terorista nga grupo ang napatay kasunod sang ground kag air assaults nga ginhimo sang pwersa sang gobyerno sa kabukiran nga sakop sang Datu Hoffer. Lakip sa napatay sa amo nga operasyon amo ang sub-leader sang Dawlah Islamiya.#
