Bangkay na sang nasapwan ang isa ka lalaki sa pavilion sa plaza sang Leganes, Iloilo.
Ang biktima nakasuksok sang blue nga bayo kag itom nga dilargo.
Nasapwan na lang ini nga nagabarikutot samtang ang iya lawas may mga pasa kag ginapahayag man nga may pilas sa ulo.
May nakita man nga dugo malapit sa lugar kun sa diin ini nasapwan.
Sa interview sang Bombo Radyo kay Punong Barangay Paul Jaen Kraft, Punong Barangay sang nasambit nga lugar, iya ginpahayag nga nakit-an pa ang biktima gab-i antes natabo ang insidente nga ngalibot-libot sa lugar.
Suno pa kay Krafft nga pangayaw ang biktima sa lugar kag ini ang una tion nga natabo ang kaangay nga insidente sa lugar.
Samtang suno naman kay Pcapt. General Enrique Robles, hepe sang Leganes Municipal Police Station, iya ginpahayag nga gina-usisa na nila ang mga cctv footages sa lugar agud makakuha sang dugang nga impormasyon sa insidente.
Nagpatigayon naman sila sang hot-pursuit operation kun sa diin may ginasundan sila nga apat tubtob lima ka mga suspek nga posible may kahilabtanan sa krimen.
Padayon pa ang imbestigasyon sang mga otoridad agud makilala ang biktima kag madakpan ang mga responsable sa natabo nga krimen.
