Naaresto na sang otoridad sa Timor Leste si anay Negros Oriental Representative Arnolfo “Arnie” Teves, Jr. nga amo ang ginatudlo nga mastermind sa pagpatay kay Negros Oriental Governor Roel Degamo.
Suno sa Department of Justice (DOJ), ang nakadakop sa anay mamalidha amo ang Scientific and Criminal Investigation Police (PCIC) sang ginabanta ‘las kuatro kahapon sang hapon sang nagahampang ini sa Top Golf Driving Range and Bar sa Dili nga amo ang kapital nga syudad sa East Timor.
Napaidalom na ini subong sa kustodiya sang Timorese Police samtang ginapangitaan naman sang paagi sang National Central Bureau (NCB)-Dili ang paghatag sa iya sa otoridad sa Pilipinas.
Ini nga pag-aresto ang natabo pila ka semana matapos ang una nga anibersaryo sang Degamo massacre nga natabo sadtong Marso 4, 2023. Sang amo mga tion, nagsulod ang armado nga kalalakinhan sa balay sang gobernador sa Pamplona, Negros Oriental kag ginluthang ini samtang nga nagapadayon ang tagtaganay sang ayuda. Sa amo nga pagpang-atake, siyam ka mga tawo ang nagkalamatay.
Sang Pebrero sini lang nga tuig, matandaan nga nabutang ang pangalan ni Teves sa red notice sang International Criminal Police Organization (Interpol) nga buot silingon, may request na sa otoridad sa bilog nga kalibutan nga pangitaon kag arestuhon ang amo nga tawo kun yara sa ila nga hurisdiksyon.
Nagpaguwa naman sang pahayag si Justice Secretary Jesus Crispin Remulla nga ang pagdakop kay Teves ang isa ka testamento sang gahum sang international cooperation. Suno pa sa tiglikom, isa ini ka maathag nga mensahe nga wala sang terorista nga makapalagyo sa hustisya kag naga-ulupdanay ang mga pungsod agud nga makudalan ang seguridad sang mga tawo.
Nahibaluan nga magluwas sa kaso nga murder, frustrated murder, kag attempted murder nga ginpangatubang sini bangud sa Degamo massacre, napasakaan man ini sang kaso bangud sa pagpatay sa tatlo ka tawo sa Negros Oriental sang 2019.
Siya kag ang 11 ka iban pa ang gin-designar anay sang Anti-Terrorism Council nga “terorista” sadtong Agusto 2023 bangud sa ginaalegar nga pagpangpatay kag harassment sa Negros Oriental.
Ginsipa man ini halin sa Kamara sang Agusto sang amo man nga tuig bangud sa disorderly conduct kag padayon nga pag-absent sa trabaho sa Kongreso apisar sang iya nga expired travel authority.
Sa tanan ini nga hitabo, sulit-sulit nga nagpanindugan si Teves nga wala siya sang kaangtanan sa tanan nga alegasyon batok sa iya.#
