Ginbuyagyag ni anay Senador Antonio Trillanes IV nga ginalauman nga magapaguwa ang International Criminal Court (ICC) sang warrant of arrest kay anay Presidente Rodrigo Duterte sa tunga-tunga sang tuig bangud sa kontrobersyal kag maduguon nga drug war sang iya anay adminitrasyon.
Pahayag pa ni Trillanes, may arrest warrant man nga sunod-sunod nga iga-isyu sang korte batok kay Vice President Sara Duterte kag sa iban pa nga personalidad nga naangot sa war on drugs.
Suno sa anay senador, nagapakig-angot siya sa ICC representatives halin sang ginpatigayon ang preliminary examination, sang ginpatigayon na mismo ang imbestigasyon, kag tubtub nga gin-basura ang apelar ni Duterte.
Posible suno sa iya nga maguwa ang warrant sa late second quarter, tunga-tunga sang tuig, ukon sa particular Hunyo ukon Hulyo.
Magluwas kay Duterte kag sa iya anak, ang iban pa nga mga indibidwal nga ginpahayag nga gina-imbestigaran sang ICC nga naangot sa drug war amo ang tokhang enforcer nga si anay Philippine National Police (PNP) chief kag subong Sen. Ronald de la Rosa kag ang long-time aide ni Duterte nga si Bong Go nga subong isa man ka senador.
Gin-insister pa ni Trillanes nga indi ini istorya “marites” ukon isa ka tsismis bangud matuod nga nagapakig-angot siya sa ICC halin pa sang 2017.
Antes sini, nauna na nga ginsapubliko ni Trillanes nga direkta nga nagpakig-angot ang ICC sa ginabanta 50 ka anay kag present officers sang PNP nga nagserbe sa Duterte administration agud nga imbestigaran man ang ila papel sang tion sang drug war.
