Nagpaandam ang Philippine National Police (PNP) nga pasakaan sang kaso ang mga aspirants sa 2023 Barangay and Sangguniang Kabataan Elections (BSKE) nga madakpan nga nagakooperar sa anuman nga taktika ukon pagpangilkil sang rebelde nga grupo agud mabuligan sila nga magdaog.
Ginpatpat ni PNP chief Gen. Benjamin Acorda Jr. nga kabahin sang ginahimo sang Communist Party of the Philippines-New People’s Army (CPP-NPA) sa eleksyon amo ang extortion activities paagi sa paghatag sang permit agud makakampanya, harassment, kag gun-for-hire operations.
“Let me caution candidates who will fall for this election racket of the CPP-NPA that any form of monetary or material support to the CPP-NPA, a terrorist organization, is tantamount to “terrorist financing” that is punishable under Republic Act No. 11479 or the Anti-Terrorism Act of 2020,” pahayag sang PNP chief.
Kun incumbent Barangay or SK official ang donor ukon magahatag sang kuwarta, isa ini ka “willful disloyalty” sa ila Oath of Office suno kay Acorda.
Suno pa kay Acorda, wala sang ginalauman nga daku nga pagpamahog sa eleksyon apang hugot nga gina-monitor ang hulag sang aktibo nga guerilla fronts.
Ginpahayag man sang PNP nga gina-monitor sini ang 48 ka private armed groups sa pungsod samtang nagahilapit ang eleksyon.
Ini nga private armed groups suno sa pulis nga subong under surveillance ang nahamtang sa central Luzon, Bicol, Western Visayas, Caraga, Cordillera Administrative Region, kag sa Bangsamoro Autonomous Region in Muslim Mindanao.
Ginasuportahan man sang PNP ang panawagan ni Interior and Local Government Secretary Benjamin Abalos Jr. sa BSKE aspirants nga magpaidalom sa drug testing agud mapabaskog ang kampanya sang pungsod batok sa iligal nga droga. #
