Resulta sang pagiging incompetent sang administrasyon ni President Ferdinand Marcos Jr., ang wala sa gihapon natigayon nga pag-aresto kay Senator Bato Dela Rosa.
Ini ang ginpakigbahin ni International Criminal Court (ICC) Assistant to Counsel Atty. Kristina Conti matapos man sini nga ginkwestyon ang P50-milyon nga padya sa makahatag sang impormasyon sa ginapanaguan sang nasambit nga senador.
Suno sa iya, posible nga ini na ang pinakadako nga padya nga igahatag agud maaresto ang isa ka indibidwal nga lapaw pa sa average annual salary ukon sweldo sang 190 ka mga Pilipino.
Lakip man sa gintawag sini nga “incompetent” amo ang mga ahensya sang gobyerno kaangay sang Department of Interior and Local Government, National Bureau of Investigation, kag Philippine National Police.
Suno sa iya, mahimo na gid tani nga naaresto si Bato, kun naghulag lang ang nasambit nga mga ahensya sang tion nga nagbalik si Dela Rosa sa Senado sang nagligad nga Mayo.
Apang suno sa iya, isa man ini ka pamatuod kun ano ka dako nga tawo ang nagaprotekta kay Dela Rosa.
Dugang pa ni Conti, dapat gid nga magsungka na ang pugante nga senador kag mag-atubang sa ICC proceedings kun sa diin pagahatagan ini sang highest standards sa iya kinamatarong bilang isa ka indibidwal.
