ILOILO – Wala nagakapaso ang Bids and Awards Committee (BAC) sa pagproseso sang bidding sa pagbakal sang mga bulong para sa mga government hospital sa probinsya sang Iloilo.
Ini ang kasunod sang akusasyon ni Iloilo 4th District Cong. Ferjenel Biron nga atrasado ang ‘procurement’ sang bulong.
Sa interview sang Bombo Radyo kay Atty. Dennis Ventilacion, BAC Chairman kag Provincial legal officer, iya ginpahayag nga ginahingagaw gid sang BAC ang pagproseso sang bidding agud nga mapadasig ang pagbakal sang mga bulong.
Santo sa layi, may yara lamang sang 90 ka adlaw ukon 3 ka bulan ang BAC agud nga matapos ang bidding.
Gin-ako ni Atty. Ventilacion nga tuman ka id-id ang proseso sang bidding kun bulong ang pagahambalan apang sa pihak sang kabudlay, gin-athag sang natungdan nga wala gid nakaagi nga naatrasar ang bidding.
Kun atrasado nga delivery naman ang pagahambalan suno sa natungdan, wala na sang kahilabtanan diri ang BAC nga nakasentro lang sa bidding process.
Una na nga ginpahayag ni Cong. Biron nga tama ka atrasado ang delivery sang mga bulong nga pagagamiton na kun tani sang mga government hospital.
Depensa naman ni Gov. Arthur Defensor Sr., kasubong nga ginabaliskad lang ni Biron ang isyu.
Ginpahayag sang gobernador nga nagareklamo lang si Biron apang wala man sang binulighan agud nga mapaayo ang serbisyo sang mga ospital sa 4th district.
