Ginpanindugan ni Interior Secretary Jonvic Remulla nga mahimo arestuhon sang executive department ang sin-o man nga myembro sang legislative branch bisan nga may yara sang separation of powers sa tunga sang duha ka nasambit nga sangay sang gobyerno.
Gin-athag ini ni Remulla matapos nga nakuhaan sang video ang ila pagbaisay ni Senate President Alan Peter Cayetano sang nagkadto ang tiglikom sa Senado agud nga iserbe ang arrest warrant nga gindagdag sang Sandiganbayan kay Senator Jinggoy Estrada sa kaso nga plunder nga naangot sa flood control scandal.
Natabo ang pagbaisay samtang nga mabiya na si Estrada sa iya opisina para sa press conference kun sa diin gin-anunsyo sini nga magasungka siya sa Criminal Investigation and Detection Group (CIDG).
Antes ang presscon, nabatian na ang CIDG personnel nga ginabasahan si Estrada sang Miranda rights nga buot silingon kabahin na sang pagdakop sa iya.
Ginabalabagan ni Cayetano ang pag-aresto bangud ginapanindugan sini nga wala sang dapat dakpon sa sulod sang premises sang Senado.
“Don’t do this right here. He can be arrested right there (gate). Sir, we’re just gonna walk [for] five minutes. This is the Senate of the Philippines. It’s never been done,” pahayag ni Cayetano kay Remulla.
Baliskad sa gina-insister ni Cayetano, matandaan nga pareho nga gin-aresto ang anay mga senador nga sanday Leila De Lima kag Sonny Trillanes samtang yara sila sa Senado bangud sa drug-related and rebellion charges sang 2017 kag 2018.
Diri naman nagtaas na ang tingog ni Remulla kag nagsiling: “Sir, sir, sir! The last person you took into custody escaped. You cannot do that.”
Ginatumod sini si Senator Bato dela Rosa nga dakpon na kuntani sang Mayo 11 apang ginhatagan sang Senado sang protective custody; may natabo nga shooting sang Mayo 13 sang gab-i; kag pagka-Mayo 14 sang kaagahon, nakit-an nga nalagyo si Dela Rosa sakay sa salakyan ni Senator Robin Padilla.
Sa pag-atubang naman ni Remulla sa media, ginpakigbahin sini nga ginprangka sini si Cayetano nga nadulaan na ini sang amo nga pribilehiyo sang nagpalagyo si dela Rosa.
“[His] question was about the separation of the executive and the legislative… I told him, in a not very calm voice because people were going upstairs, ‘Sir, I’m sorry. You lost that privilege when [Sen. Ronald ‘Bato’ dela Rosa] escaped,’” suno kay Remulla samtang yara sa Camp Crame.
Suno kay Remulla, pahibaluon man kag hatagan sang kurtesiya ang Senado, apang kun may arrest nga himuon, himuon gid ini sang law enforcement.
“If it is necessary, we will always do what is necessary according to the bounds of law. Remember, there is no such law as you cannot arrest anyone inside the Senate. It’s a privilege granted to the legislative,” pahayag pa sang tiglikom.#
