Wala sang nakit-an nga rason si Senator Panfilo “Ping” Lacson agud kuwestyunon sa subong ang pagbiyahe ni Senate Minority Leader Alan Peter Cayetano sa luwas sang pungsod.
Ini ang pahayag ni Lacson matapos ginkumpirmar sang Bureau of Immigration (BI) nga nagbiyahe abroad sang Miyerkules sang gab-i, Septyembre 9, sanday Cayetano kag iya utod nga si Senator Pia Cayetano.
Suno kay Lacson, base sa impormasyon nga iya nabaton, kaupod man sa biyahe si Taguig Mayor Lani Cayetano kag may kaangtanan ini sa reproductive health concerns.
Ginbali ni Lacson ang mga espekulasyon nga mahimo may kaangtanan ang pagbiyahe ni Cayetano sa pagpangayo sang asylum, bangud wala suno sa iya sang basehan ang amo nga pang-duhaduha.
Suno kay Lacson, indi mangin isyu ang pagkadula ni Cayetano samtang wala pa nagasugod liwat ang sesyon sang Senado.
Mahimo lamang ini mangin problema suno sa iya kun magbalik na ang Senate sessions pero wala gihapon makabalik si Cayetano agud tumanon ang iya opisyal nga katungdanan.
“I really sincerely wish him well. Kung mayroon siyang health problem, hindi naman ganun ka-serious. Huwag lang siyang tutuloy sa France,” suno pa sa senador. “Hindi pa naman siya tinatawag eh ng Ombudsman. Wala pa namang summons.”
Matandaan nga nahinambit sang Ombudsman nga nangin “hiding place” ang France sang mga opisyal nga gina-imbestigaran diri sa Pilipinas lakip na sanday Senator Loren Legarda kag resigned Congressman Zaldy Co.
Nahibaluan man nga nangin matunog ang word war nanday Cayetano kag Lacson halin sang nagligad nga mga binulan, nga nakalab-ot pa sa mga ginaalegar nga iregularidad sa flood control projects sa Taguig.
