Ginpaathag ni Senate President Sherwin “Win” Gatchalian nga indi kinahanglan maglisensya sa Senado ang mga senador kon personal lamang ang ila pagbiyahe sa luwas sang pungsod.
Ini ang pagpaathag ni Gatchalian matapos madamo ang nagkwestyon sa paghalin sa pungsod nanday Senators Alan Peter Cayetano kag Pia Cayetano sang Miyerkules, September 9, kag sa pagbyahe man ni Taguig City Mayor Lani Cayetano sang Huwebes, September 10.
Ginkumpirma man sang Bureau of Immigration (BI) ang amo nga byahe sang mag-utod apang wala sang ginhatag nga detalye.
Suno kay Gatchalian, kinahanglan lamang maglisensya ang mga senador kon official trip ini kag nagakinahanglan sang travel authority ukon may opisyal nga imbitasyon. Partikular ini, suno sa iya, kon may gamiton nga pondo ang Senado para sa hotel, pamasahe kag mga staff nga kaupod sa biyahe.
“Personal trip yun eh, we don’t know kung anong reason. Walang policy na kailangang magpaalam kung personal reason,” suno sa Senate leader.
Suno man kay Gatchalian, wala siya sang ihibalo kon san-o magbalik sanday Cayetano bangud ang ila katapusan nga ginhambalan sa Senado ang may kaangtanan lamang sa pila ka mga ginaproponer nga kasuguan.
“Hindi pa kami nagkakausap eh. The last time kami na nagkita noong may session, nag-usap kami about certain bills,” dugang sini.
Ginsegundahan man ini ni Senate Majority Leader Juan Miguel ‘Migz’ Zubiri.
“They are there for health reasons. I wish them well. That’s okay, there’s no problem,” pahayag sang Majority Leader.
Nahibaluan nga gin-link si Cayetano sa kontrobersiya kaangot sa pagtukod sang cauldron ukon “kaldero” nga gin-gamit sa 2019 Southeast Asian Games.
Ang National Bureau of Investigation ukon NBI amo ang nagapanguna sa imbestigasyon sa sini nga isyu, kag suno kay NBI Director Melvin Matibag, malapit na sila nga makapapasaka sang mga kaso.
Nagahimo man ang Ombudsman sang fact-finding investigation sa mga dokumento kag iban pa nga ebidensya nga ginsumiter ni Senador Panfilo Lacson may kaangtanan sa reclamation project sang Taguig City sa isa ka bahin sang Laguna Lake.#
