Nagpaguwa ang Australian government sang advisory sa ila nga mga residente kun magbyahe sa Pilipinas bangud sa isyu subong sang seguridad.
Base sa abiso, ginapaandaman ang mga byahero nga maghalong gid bangud sa pamahog sang terorismo kag violent crime, amo man sang mga demonstrasyon kag civil unrest.
Nagpanawagan man ini nga likawan ang protesta kag ang dalagku nga mga pagtilipon nga posible mangin bayolente.
“We continue to advise exercise a high degree of caution in the Philippines. There’s an increased risk of demonstrations and civil unrest following recent events,” base sa nakabutang sa advisory.
Ginbutang man nga mahimo matabo ang terrorist attacks sa bisan diin nga parte sang Pilipinas, kag mahimo ma-target ang airports, public transportation, hotels, shopping malls, restaurants, major events, places of worship, kag tourist areas.
“Do not travel to central and western Mindanao, including the Zamboanga Peninsula, Sulu Archipelago, and the southern Sulu Sea area due to the very high threat of terrorism and kidnapping,” dugang pa diri.
Ini nga abiso ang ginpaguwa matapos ang pagka-aresto kay former President Rodrigo Duterte sang Marso 11 nga subong yara na sa kustodiya sang International Criminal Court (ICC) sa The Hague, Netherlands.
Ginabantayan nga ipaidalom ini sa trial bangud sa alleged crimes against humanity kasunod sang war on drugs campaign.
Sunod man nga ginpaidalom ang tanan nga units sang Philippine National Police sa heightened security alert status bangud sa possible protest actions.#
