Balantayan subong nga adlaw, Mayo 11, ang pagboto sang mga kongresista sa impeachment batok kay Vice President Sara Duterte.
Ginalauman nga matabo ini karon sa hapon kadungan sang pag-resume sang session sang Kamara.
Sandig sa naga-guluwa nga impormasyon halin sa mga mamalidha, mahapos nga malab-ot sang lower house ang minimum requirement nga 106 ka mga boto nga amo ang kinahanglan agud nga mapasaka ang Articles of Impeachment sa Senado para sa trial.
Kun si Bicol Saro Rep. Terry Ridon ang pahambalon, may 215 ka mga boto na nga na-secure sang nagligad nga semana nga patas na ukon lampas pa gani sa kadamuon sang nagboto sang nagligad nga tuig.
Base naman kay National Unity Party chairman Deputy Speaker Ronaldo Puno, may 180 na ka boto nga iya ginalantaw para sa impeachment.
Suno naman kay House justice committee chairperson Rep. Gerville Luistro, ginaantisipar nila nga hatagan sila sang oportunidad nga madepensahan ang committee report kag depensahan ang findings nga may probable cause agud nga i-impeach si Duterte.
I-deliver ni Luistro sa plenaryo karon sa hapon ang iya sponsorship speech.
Nagapati man ini nga konsensya sang mga mamalidha ang mangibabaw kun magaboto sila ukon indi.
Himuon ang botohay sa plenaryo paagi sa nominal voting kun sa diin hatagan ang kada House member sang tion agud nga ihambal ang iya mangin boto — kun YES ukon NO sa impeachment.
Sa idalum sang 1987 Constitution of the Philippines, ang indi magnubo sa one-third sang tanan nga miyembro sang House of Representatives 106 ka boto halin sa 318 ka miyembro sang chamber amo ang kinahanglan para nga maaprubahan ang Articles of Impeachment kag ipasaka sa upper chamber kun sa diin maga-convene ang Senado bilang impeachment court para sa trial.#
