ILOILO CITY- Kumpirmado nga ginhimuslan ang babaye nga nasapwan nga patay sa Brgy. Tambong, Miagao, Iloilo sang nagligad nga Domingo.
Ang biktima amo si Marivic Felesicimo, 52-anyos, residente sang lugar kag nasapwan nga ara na sa advance state of decomposition kun sa diin yupok ang agtang sini kag wala na sang pang- idalom nga panapton.
Suno kay Police Capt. Francis Donne Lomahan, hepe sang Miagao Municipal Police Station, ini nga kumpirmasyon nga ginhimuslan ang babaye ang kasunod man sang ginpatigayon nga autopsy.
Pahayag ni Lomahan, sa subong, ginahulat na lang nila ang opisyal nga resulta agud mapasaka ang kaso batok sa suspect nga amo ang 26-anyos nga lalaki nga nakit-an sa CCTV footage nga nagalakat sa karsada kag ginasundan ni Felecisimo sang gab-i antes ini nadula tubtob nasapwan nga patay.
Dugang ni Lomahan, may yara naman sila sang ginauyatan nga testigo.
Nagapabilin naman nga at large ang suspek.
