May isa ka babayi sa China nga feeling niya, alam-alam na gid siya kag mas maabtik pa ang pinsar ipaanggid sa mga pulis!
Ini bangud ginbutangan niya sang global positioning system ukon GPS tracking devices ang mga patrol cars sang pulis sa iya nga lugar agud mahibaluan niya kun sa diin ang ila nga ruta kag malikawan nga masugata sang iya ginapanag-iyahan nga mga truck.
Ini nga babayi nga si Zhu ang residente sang Xiangyang, Hubei province kag nagapanag-iya sang trucking company.
Nakapoy na ini sa mga multa sa iya kun madakpan sang mga pulis nga may violation ang iya ginapanag-iyahan nga mga truck.
Ini ang rason nga sang naka-tyamba siya kag nakit-an nga naga-park ang mga police patrol cars sa Xiangzhou station, ginbutangan niya ini sang tracking device.
Gin-career gid niya ini bangud nagbakal pa siya sang anum ka magnetic nga trackers online.
Sa sulod sang pila ka bulan, nangin madinalag-on ang iya plano kag nalikawan niya ang mga pulis rason nga wala namultahan ang iya mga truck.
Apang wala ini nagdugay bangud natukiban sang mga pulis kadungan sang routine checkup nga may yara sang makaduluda nga itom nga box sa ila nga patrol car.
Sang gin-usisa, nahibaluan nga tracker ini kag nakabutang pa gid sa iban nila nga mga salakyan.
Paagi man sa amo nga tracking devices nadakpan ang babayi kag gindagdagan sang penalidad nga walo ka adlaw nga administrative detention kag $70 ukon malapit P4,000 nga multa.
Maswerte na ang babayi bangud sa amo lang nga multa, bangud pananglitan sa Western world ini natabo, indi basta-basta nga multa ang iya atubangon bangud sa seryoso nga krimen nga iya nahimo.#
via Oddity Central
