Napuno sang emosyon ang selebrasyon sang 10th wedding anniversary sang celebrity couple nga sanday Chito Miranda kag Neri Naig.
Ginselebrar ini paagi sa pag-renew sang ila wedding vows kun sa diin kabahin sang entourage ang ila kabataan nga sanday Pia, Miggy, kag Cash.
Disyembre 2024 pa ang orihinal gid nga anibersaryo sang ila kasal, naatrasar, apang suno sa vocalist sang Parokya ni Edgar, ang importante amo nga nadayon, kag wala man sila nagadali.
“Baby, mahal na mahal kita. I’ve never loved anyone as much as I love you,” mensahe ni Chito kay Neri. “Dahil sa ‘yo at sa mga anak natin, naunawaan ko ang tunay na ibig sabihin ng pagmamahal.”
“I’m not going anywhere, at habambuhay naman tayo magsasama. Hinding-hindi kita papabayaan,” kabahin sang gin-post ni Chito. “Happy 10th anniversary, asawa ko. Tag team partners for life.”
Ginhimo ini nga selebrasyon pila ka adlaw matapos ginlimpyuhan sang korte ang pangalan ni Neri matapos ginpasakaan sang kaso nga syndicated estafa kag violations sang Securities Regulation Code.
Matandaan nga gindakop ang actress-entrepreneur sadtong 2024 apang nagdepensa si Chito nga endorser gid lamang ang iya asawa sa involved nga kumpaniya nga Dermacare kag gingamit lamang ang nawong sini agud nga mang-engganyo sang mga investor.
