Ginalantaw sang World Health Organization (WHO) nga magasaka sa masobra 35 million ang bag-o nga kaso sang cancer sa 2050 — numero nga 77% nga mas mataas ipaanggid sa 20-million nga na-rekord sang 2022.
Ang datos nga ginpaguwa sang WHO-International Agency for Research on Cancer ang naga-cover sang 185 ka mga pungsod kag 36 ka sahi sang balatian.
Suno sa researchers, ang lung cancer amo ang pinaka-common nga sahi sang 2022 – rason sang 2.5 million nga mga kaso nga 12.4% sang kabug-usan.
Ginasundan ini sang cancer sa female breast, colorectal, prostate kag stomach.
Sandig pa sa ahensya, ang sigarilyo, makahulubog nga ilimnon, tuman nga katambukon sa lawas, kag mahigko nga hangin ang posible mayor nga mga rason sa pagtimbuok sang kaso sa 2050.
Suno pa sa WHO, ang most-developed countries ang ginalantaw nga makapagkita sang pinakadaku nga numero sang pagtaas sa kaso.
Apang kun basehan naman ang porsyento, ang mga pungsod sa idalom nga bahin sang Human Development Index (HDI) nga ginagamit sang UN ang makitaan sang pinakadaku nga proportional increase nga tubtub sa 142 percent.
Dugang pa diri, ang mga pungsod sa medium range ang posible maka-rekord sang 99% nga increase. #
