Padayon nga nagahina ang Bagyo Francisco samtang nga nagahulag ini pa-nakatundan sa Philippine Sea.
Sa 5:00 am weather bulletin sang Philippine Atmospheric, Geophysical and Astronomical Services Administration (PAGASA), nakit-an ang sentro sang bagyo sa 275 km nasidlangan sang Basco, Batanes.
Dala sini ang kabaskugon sang hangin nga 155 km/h malapit sa sentro kag pagmadlos nga tubtub sa 190 km/h.
Nagapabilin naman sa Wind Signal Number 1 ang Batanes kag ang northeastern portion sang Cagayan lakip na ang Babuyan Islands.
Sa pihak nga bahin, ang Southwest monsoon ukon habagat nga ginapabaskog sang bagyo ang magadala naman sang pagmadlos sang hangin ilabi na sa mga baybayon sa Luzon, Visayas, Misamis Occidental, Lanao del Norte, Camiguin, Dinagat Islands, Davao Occidental, kag Davao Oriental.
Suno sa ahensya, magapabilin ang bagyo nga malayo sa landmass ukon sa duta sa Pilipinas.
Magaguwa ini sa Philippine Area of Responsibility (PAR) bwas sa gab-i ukon sa Byernes sang aga.
Padayon man nga gina-monitor sang state weather bureau ang isa ka bagyo sa gwa sang PAR nga may international name nga Higos.
Ulihi ini nga nakit-an sa kalayuon nga 2295 km east sang Southeastern Luzon. Dala sini ang kabaskugon sang hangin nga 65 km/h kag pagmadlos nga tubtub sa 80 km/h.#
