Nakaguwa na sa Philippine Area of Responsibility (PAR) si Bagyo Francisco ukon may international name nga Mekkhala, apang suno sa state weather bureau, nagbulos man kag nagsulod si Bagyo Gardo nga may international name nga Higos.
Suno sa Philippine Atmospheric, Geophysical and Astronomical Services Administration (PAGASA), nagsulod si Gardo sa PAR alas tres kahapon sang hapon.
Sandig sa nauna nga forecast sang ahensya, mas madasig lang ang tinir ni Gardo sa PAR.
Sa alas singko sa kaagahon nga weather bulletin, nakit-an ang sentro sang Severe Tropical Storm Gardo sa kalayuon nga 1,280 km nasidlangan naaminhan nasidlangan sang Extreme Northern Luzon.
May dala ini nga kabaskugon sang hangin nga 95 km/h malapit sa sentro kag pagmadlos nga tubtub sa 115 km/h.
Wala sang ano man nga lugar nga napaidalom sa wind signal.
Malayo ang bagyo sa landmass ukon sa kadutaan sa Pilipinas sa bilog nga forecast period gani nga wala ini sang direkta nga epekto sa panahon sa pungsod.
Ginalantaw nga magaluya ini kag mahimo nga tropical storm karon sa hapon kag magaguwa man gilayon sa PAR.
