ILOILO CITY – Ginkumpirma ni Punong Barangay Rex Labordo sang Tagbak, Jaro, Iloilo City nga yara sa ila lugar naga-istar ang kontrobersyal nga COVID-19 patient nga rason sang pagsingki-anay nanday Iloilo City Mayor Jerry Treñas kag Pavia, Iloilo Mayor Luigi Gorriceta.
Sa interview sang Bombo Radyo kay Labordo, iya ginpahayag nga ang kontrobersyal nga COVID-19 patient amo ang ika 48 nga kumpirmado nga kaso sa Western Visayas kag iloy sang ika 17 nga pasyente nga sa subong nag-ayo na sa virus.
Suno kay Labordo, makabig nga secretive ang pamilya sang nasambit nga mga pasyente apang santo sa iya nahibalu-an, Marso 7 sang nagpauli halin sa Metro Manila si Patient no. 17 kag gilayon nga nagderetso sa hospital matapos nakabatyag sang sintomas kag sang Marso 30 lang nakumpirma nga nagpositibo sa COVID-19.
Ginpahayag ni Labordo nga sang Marso 15, nagpadulong sa ginapanag-iyahan nga balay sa banwa sang Pavia ang iloy agud nga indi maka-angkon sang close contact sa iya anak nga COVID-19 positive.
Wala lang nahibalu-an ni Labordo kun paano nagpositibo sa COVID-19 ang 77 anyos nga si Patient no. 49.
May yara sang Ambulance nga iya sang banwa sang Pavia nga nagsugat ka apat ka mga kaupod sa balay sang COVID-19 positive.
Wala lang nakahibalo ang natungdan kun sin-o ang nagmandu nga sugaton sa Brgy. Tagbak ang apat samtang gilayon naman nga gin-disinfect ang balay sang mag-iloy.
