GUIMARAS – Duha ka adlaw na ang nagligad sang ginkibot kag ginpasiyagit sang isa ka makahalanusbo nga balita ang isa ka pamilya sa Constancia, San Lorenzo, Guimaras. Ini matapos ginpakita paagi sa Facebook Live ang pagpanginmatay sang isa ka Ilongga domestic helper sa Riyadh, Saudi Arabia.
Apang para kay Nocnoc, bana sang biktima, preska kag nagabalik-balik ini gihapon sa iya paminsaron bangud magluwas nga wala pa nakapauli ang bangkay sang iya asawa sa ila puluy-an, madamo sang mga netizens ang nag-share sang screenshot photos, nagpalapta sang screen recorded videos, kag nagkomento nga daw kaangay nga nakahibalo kun ano ang puno kag punta sang mga istorya.
“Sa iban nga naga-comment sang negative kag naga-share sang mga video kag picture sang asawa ko, untata niyo na ina kay wala na sang maayo nga dulot sa amon kay ari kami sa madulom kag masakit nga nga bahin sang kabuhi namon. Imbes nga nagabulig kamo, naga-bash pa kamo kag naga-comment sang negative,” pahayag ni Noc-noc.
‘WALA SANG DINAHUM-DAHUM’
Pulo ka tuig na nga naga-updanay bilang mag-asawa sanday Noc-noc kag Cheryl. Sila ang ginbugayan sang duha ka anak nga subong nagpang-edaron na sang siyam ka tuig (babaye) kag walo ka tuig (lalaki).
Sang nagligad nga tuig, nagdesisyon si Cheryl nga magpadulong sa luwas sang pungsod agud mapatin-ad ang ila pangabuhi.
“Halos adlaw-adlaw nagavideo-call kami,” panugiron ni Noc-noc. “Ginatagaan ko gid na sang oras nga mga alas-onse dir [Pilipinas] asta ala-una kay bag-o lang na siya bugtaw didto.”
Gintuad ni Nocnoc nga may mga ‘away mag-asawa’ man nga nagakatabo sa ila apang suno sa iya, ginatinguhaan niya nga masolbar ang indi paghangpanay antes pinduton ang end-call sa ila komunikasyon kada adlaw.
“Gina-insist niya nga may babaye ako,” sabat ni Noc-noc sa alegasyon nga nagapangimon ang iya asawa. Ini tanan suno kay Noc-noc ang himu-himo lang sa isip sang iya asawa bangud sa pagkamatuod, masako siya sa pag-atipan sang ila duha ka anak, pagtatap sang ila nga mga tanum, kag pagpangita sang sideline nga trabaho agud mabatak ang pamilya gikan sa kapigaduhon.
Magluwas diri, nakamuno man ang iya asawa nga mauti ang nanay sang iya employer sa amo nga pungsod.
Byernes, Marso 5, sang nakatawganay si Nocnoc kag Cheryl — tion nga wala ginlauman ni Nocnoc nga amo na ang katapusan nila nga pag-istoryahanay.
“Mga ‘las kuatro sa aga, nagkinagula sila sa palibot. Nagkadto ang pakaisa ko di. Nagdiretso ako call sa asawa ko… tingala ko nga wala na siya nagasabat,” paglaragway ni Noc-noc sang adlaw sang Sabado — tion nga nahibaluan niya nga wala na si Cheryl. “Nakita ko. Nakita ko [ang Facebook live]…”
‘MASAKIT KAG MADULOM’
Nagpangayo na sang bulig si Nocnoc sa Overseas Workers Welfare Administration ukon OWWA. Duha ka semana ang ginpasalig sa iya antes makaabot si Cheryl sa Pilipinas, apang indi pa pat-od kun i-cremate ang bangkay. Nagalaum si Nocnoc nga maabot gid ang lawas ni Cheryl kag mapadasig ang pag-abot sini sa ila puluy-an.
“Sa tanan nga naka-intindi sa akon, salamat gid. Sa tanan nga nagakomento sang negative, untata niyo ina. Wala na sang maayo kag dulot sa amon kay ari kami sa madulom kag masakit nga bahin sang kabuhi namon,” mensahe ni Nocnoc sa publiko.
Nagahingyo man si Nocnoc sa provincial government sang Guimaras kag sa provincial government sang Iloilo agud mabuligan ang ila pamilya.#
Kun ikaw (ukon kun may kakilala ka nga) at-risk sa suicide, mahimo magkontak sa sini nga mga numero para sa mental health crisis intervention:
SUICIDE PREVENTION HOTLINE CENTER FOR HEALTH DVELOPMENT WESTERN VISAYAS
1-800-10-333-8336
09985324047
09255469919
WVSUMC – 3202431 loc. 162 or 209
3292360
WVMC – 3211797 loc. 186
5037708
PMHU – 5298109
