Wala pa gihapon nakuha ang bangkay sang duha ka Filipino seafarers nga lakip sa tatlo nga napatay bangud sa pag-igu sang missile sa ila nga barko nga True Confidence sa Gulf of Aden.
Suno kay Migrant Workers Officer-in-Charge Hans Leo Cacdac, nag-igu gid ang missile sa fuel section sang barko kun sa diin nagatinir ang duha ka mga biktima. Bangud sini, gilayon nga ginpatigayon ang emergency evacuation bangud sa tuman ka daku nga sunog kag wala naman nabalikan ang duha nga napatay.
Una naman nga gin-report nga nagbulig ang Indian Navy agud nga madala ang iban nga crew sa ospital lakip ang 13 ka iban pa nga Pinoy seafarers.
10 diri nga mga Pinoy ang hilway na sa katalagman samtang padayon naman nga ginabulong ang tatlo nga Pinoy sa ospital sa Djibouti City sa Horn of Africa bangud sa mga samad nga ila naangkon.
Ginsulit ni Cacdac nga may kinamatarong ang Filipino seafarers nga magpangindi sa deployment kun mahibaluan nila nga magalayag ang barko sa “high risk areas” ilabi na sa kun sa diin nagapang-atake ang rebelde nga Houthis nga halimbawa amo ang south sang Red Sea kag bug-os nga Gulf of Aden.
Pahayag pa sini, ang kutob naman sang magapasugot nga mag-upod sa deployment apisar pa sang mataas nga risgo ang dapat nga makabaton sang mas mataas nga sweldo kag mga benepisyo.
Sandig sa Joint Manning Agency (JMA), 70 percent na sa mga barko ang naga-reroute agud likawan ang Red Sea kag ang Gulf of Aden apang may iban man nga nagakapilitan nga didto mag-agi bangud sa tuman nga gasto kun mangita pa sang alternatibo kag mas malayo nga mga ruta.
