Yara na sa advanced state of decomposition ang bangkay sang isa ka overseas Filipino worker (OFW) sang nasapwan sa ugsaran mismo sang iya amo sa Saad Al-Abdullah, Jahra sa Kuwait.
Ang biktima amo si Dafnie Nacalaban nga duha ka bulan man nga na-missing antes nabalahuba ang natabo sa iya.
Suno sa iya utod nga si Michael Nacalaban Lensahan, natalana kuntani nga magpauli si Dafnie sa Disyembre apang wala sang ginhatag nga eksakto nga petsa agud nga sorpresahon ang iya pamilya. Ginpahayag man nga sang nag-istoryahanay sila sang Mayo 2024, wala man ini sang ginpakigbahin nga problema.
Ginahingyo sang pamilya nga madala pauli ang bangkay sang Pinay domestic worker kag mahatagan sang hustisya ang iya kamatayon.
Sa pihak nga bahin, nag-report naman si Department of Foreign Affairs (DFA) Undersecretary Eduardo de Vega nga may suspek na sa insidente kag subong na-detain na sang otoridad.
May yara na sang nauna nga criminal record ang suspek kag mismo ang utod sini amo ang nagpanugid sa mga pulis rason nga may ginhimo nga imbestigasyon. Gin-alegar man nga mabudlay ini kuhaan sang impormasyon nga possible bangud man sa paggamit sini sang iligal nga droga.
Nagpasalig man ang DFA nga himuon sang gobyerno ang obligasyon sini agud mahatag ang hustisya.
