Nadala na pauli sa Pilipinas ang bangkay sang isa ka overseas Filipino worker (OFW) sa Kuwait matapos nasapwan ini nga nalubong sa ugsaran sang nagligad nga Disyembre 2024.
Suno sa Overseas Workers Welfare Administration (OWWA), dal-on ang bangkay ni Dafnie Nacalaban sa balay sang iya pamilya sa ila probinsya para nga makaupod man sini ang iya mga himata sa ulihi nga tion.
Ang 35-anyos nga Pinay ang tumandok sang Cagayan de Oro apang naga-istar na sa Zamboanga del Sur kaupod ang iya partner kag 14-anyos nga bata.
Nag-trabaho si Nacalaban bilang household service worker sa Kuwait halin sang Disyembre 2019, apang gin-report sang iya ikaduha nga employer nga na-missing sadtong Oktubre 2024. Disyembre 31 sang amo man nga tuig sang nakit-an ang lawas sini nga yara sa advanced state of decomposition sa balay sang isa pa ka Kuwaiti national sa Saad Al-Abdullah, Jahra.
Padayon ang pagpakig-angot sang Department of Foreign Affairs, Department of Migrant Workers, Overseas Workers Welfare Administration, kag Embahada sang Pilipinas sa Kuwait sa mga awtoridad para masiguro nga mahatagan sang hustisya ang kamatayon sini.
Nahibaluan nga madamo na nga OFWs ang napatay sa Kuwait lakip sanday Jullebee Ranara nga ginsunog kag nasapwan sa disyerto sang 2023; Joanna Demafelis nga ginpatay kag ginsulod sa freezer sang iya employers sang 2018; Constancia Lago Dayag nga ginpatay man sang iya employer sang May 2019; kag Jeanelyn Villavende nga ginpatay man sang iya ama sang Disyembre 2019 bangud sa pagpangimon.
Ini nga mga insidente ang nagtulod sa deployment ban, apang bangud sa mga negosasyon, na-lift ang ban sang 2020 kag gintugutan liwat ang mga Pinoy nga mag-trabaho sa amo nga pungsod sa Middle East.
Bangud sa pinakaulihi nga mga insidente, ginsiling sang DMW nga ginakonsiderar liwat ang pagbalik sang deployment ban sa amo nga nasyon.
