Isa ang pilason matapos maigo sang barangay tanod nga nagpinalupok sang armas sa isa ka namatyan sa Sitio Carig-on, Brgy. Agsanayan, Buenavista, Guimaras.
Ang biktima amo si Alyas Micheal, 47, samtang ang suspek naman amo si alyas Merel, 45.
Sa inisyal nga report, nakaangkon sang samad sa tiyan ang biktima.
Sa interview sang Bombo Radyo kay Police Captain Rene Mercado, officer-in-charge sang Buenavista Municipal Police Station, iya ginpahayag nga nagresponde sila sa Brgy. Piña Buenavista, Guimaras matapos may nagpangayo sang police assistance, apang sang nakalab-ot ini sila sa Brgy. Agsanayan, ginparahan sila sang mga pumuluyo bangud may nagpinalupok sang armas.
Base sa imbestigasyon sang kapulisan, yara sa impluwensiya sang makahulubog nga ilimnon ang suspek kun sa diin nagbaisay sila sang iya tiyo kag nagkuha ini sang 38 caliber revolver kag nagpinalupok.
Nakahunong na sa custodial facility sang Buenavista police ang suspek matapos nadakpan sa hot pursuit operation.#
(Article: Bombo Phauline Pillora)
