Nagpanawagan ang Department of Justice (DOJ) sa mga otoridad sa Timor-Leste nga i-deport na insigida si anay Negros Oriental Rep. Arnolfo “Arnie” Teves Jr. matapos gin-alegar nga gintuyo sang anak sini nga i-bribe ang kapulisan.
Base sa reports nga nabaton sang DOJ, nagtuyo nga maghatag ang bata ni Teves sang $2,000 ukon P114,000 sa myembro sang Criminal Investigation Police bilang kabaylo sang special treatment kaangay sang “security” sa sulod kag guwa sang Becora Prison kun sa diin nagatinir subong ang anay mamalidha.
Suno pa sa DOJ, napaidalom subong ang anay kongresista sa pre-trial detention.
Pahayag naman ni Justice Secretary Jesus Crispin Remulla, dapat nga magpauli na si Teves sa Pilipinas, atubangon sang patas ang iya mga kaso, kag indi na magpanago sa layi bangud indi man mapalagyuhan ang iya salabton sa iya bilog nga kabuhi.
Si Teves amo ang ginatudlo nga mastermind sa pagpapatay kay anay Negros Oriental Governor Roel Degamo sa Pamplona, Negros Oriental sang Marso 2023 kun sa diin may siyam ka iban pa nga mga tawo nga nadalahig kag napatay sa pagpang-atake sang armado nga kalalakinhan.
Marso naman subong nga tuig sang naaresto si Teves samtang nagahampang ini sang golf sa isa ka driving range sa Dili sa East Timor.
Nagapangatubang ini sang kaso nga murder, frustrated murder, kag attempted murder.
Magluwas sa ginaalegar kaangtanan sa Degamo massacre, napasakaan man sang kaso si Teves kag iban pa sini nga kaupdanan bangud sa separado nga kaso sang ginaalegar pagpatay sa tatlo ka mga tawo sa Negros Oriental sang 2019.
Agusto sang nagligad nga tuig sang ginsipa si Teves sa iya posisyon bilang miyembro sang Kamara bangud sa gin-cite nga indi maayo nga paggawi kag padayon sini nga pag-absent sa trabaho apisar nga na-expire na ang iya travel authority.#
