Bato Dela Rosa nga absent gihapon sa Senado, nagduso sang duha ka hagna

Nagduso sang duha ka hagna si Senator Ronald “Bato” Dela Rosa apisar nga padayon ini sa pag-absent sa Senado.

Sandig sa record sang upper chamber, pirmado ni Dela Rosa ang duha ka hagna nga gin-file sa Senate Bills and Index Section kasunod sang pag-resume sang session subong nga semana.

Ini nga mga hagna ang ginpasa sang iya nga staff kag ginbasa kadungan sang plenary session sang Myerkules, Mayo 6.

Ang isa ka hagna amo ang proposed Senate Bill (SB) 2080 ukon ang Counter Foreign Interference Act.

Luyag sini nga dagdagan sang penalidad ang foreign interference ukon pagpanghilabot sang iban nga pungsod, kag mag-establisar sang counter foreign interference council nga amo ang magaplastar sang focus programs sa critical components kaangay sang political, economic, social, technological, education, legal kag military.

Ang isa pa ka gin-file sini amo ang SB 2079 ukon ang National Police Clearance System (NPCS) Act.

Nagatuyo ini nga mas mapabakod pa ang operationalization sang amo nga sistema lakip na ang maintenance sang centralized record sang tanan nga na-report nga crime incidents, warrants of arrest, pictures kag personalized details sang arrested kag wanted persons.

Nahibaluan nga nagsugod sa pag-absent si Dela Rosa sang Nobyembre 2025 sang nagguwa ang huring-huring nga nag-isyu na ang International Criminal Court (ICC) sang arrest warrant batok sa iya bangud sa controversial nga war on drugs.

Si Dela Rosa nga anay PNP Chief sang Duterte administration amo ang nagapanguna sa mga senador subong nga may pinakadamo nga absent.

May request na anay sa iya nga untatan na lang anay ang pagbaton sang sweldo kag allowances halin sa Senado samtang nga wala pa ini naga-report sa chamber bangud sa iya pagpanago.