Wala sang kahangawa si US President Joe Biden sa padayon pa nga pagtaas sang balor sang US dollar.
Sa baylo, ginbasol sini ang anemic growth kag sala nga mga polisa sa iban nga bahin sang kalibutan nga amo suno sa iya ang nagapalala pa sang dalagan sang pagkalibutanon nga ekonomiya.
“I’m not concerned about the strength of the dollar, I’m concerned about the rest of the world,” suno kay Biden.
Kun Estados Unidos lang ang hambalan suno kay Biden, tuman ka pag-on ang ekonomiya sini.
“Our economy is strong as hell — the internals of it. Inflation is worldwide. It’s worse off everywhere else than it is in the United States. So the problem is the lack of economic growth and sound policy in other countries, not so much ours,” pahayag sang presidente.
Baliskad ang komento ni Biden sa statements sang iban nga mga lider halin sa iban nga mga pungsod nga nagareklamo nga ang nagataas nga balor sang US dollar ang rason sang pagtaas pa sang inflation sa ila tagsa ka ekonomiya.
Ang mataas nga dolyar ang nagahatag bug-at sa ekonomiya sang pigado nga mga pungsod ilabi na ang nagasalig sa food imports.
Ang kombinasyon sang mataas nga dolyar, mataas nga interest rates, kag ang mataas man nga commodity prices ang nagapanubo pa sa gahum sang iban nga mga nasyon nga makabakal sang pagkaon. Bilang resulta, nagalala pa ang global food crisis.
Lain ang komento ni Biden ipaanggid sa iban nga mga presidente sang Estados Unidos. Kun matandaan, sang tion ni anay US President Donald Trump, ginpahayag sini nga indi sini gusto ang mataas nga dolyar nga may malain nga epekto sa trade sa iban nga mga nasyon.
