Magapadulong sanday US President Joe Biden kag first lady Jill Biden sa Hawaii sa masunod nga semana agud mangamusta kag lantawon ang nabilin nga halit sang makamamatay nga wildfires sa resort town sang Lahaina sa Maui.
Suno sa statement sang White House, una nga atubangon sang presidente ang responders, survivors, amo man ang federal, state kag local officials.
Sa subong, yara na sa 106 ka mga tawo ang napatay sa Lahaina, 2,200 buildings ang naguba, kag nagdangat sa $5.5 billion masobra P311.2-billion ang balor sang kahalitan.
Ginatos ka tawo ang ginapatihan nga missing sa gihapon kag padayon nga ginapangita sa disaster zone sa bulig sang 20 ka cadaver dogs.
Sa latest nga impormasyon halin kay Governor Josh Green, 27% pa lamang sang disaster site ang napaidalom sa search. Ginakahangaw-an nga magsaka ang numero sang patay, ukon posible nga mag-doble, sa masunod nga 10 ka adlaw. #
