Nag-request si US President Joe Biden sang dugang nga $128 million ukon P7.24-billion para sa infrastructure projects sa 2025 kun sa diin nalakip ang Enhanced Defense Cooperation Agreement (EDCA) sites sa Pilipinas.
Nakasaad ini sa Budget Request sang presidente sa Kongreso para sa Fiscal Year 2025.
Suno sa fact sheet nga ginpaguwa sang White House, magalunsar ang US Agency for International Development (USAID) sang bag-o nga inisyatibo para sa masunod nga tuig kun sa diin may iga-preposition nga humanitarian relief commodities sa EDCA site.
Ang EDCA ang napirmahan sang 2014 kag nakasaad diri nga mahimo makahanas sang tingob ang militar sang Amerika kag Pilipinas.
Halin sa lima ka sites, nahimo naman nga siyam ang EDCA sites diri sa Pilipinas sang 2023 nga ginkaakig naman sang China.
Suno sa White House, ang USAID nga maga-partner sa US Department of Defense ang magapasangkad pa sang civilian-military disaster response training para nga mapauswag pa ang response systems sa tunga sang civilian kag military agencies sang Pilipinas kag Amerika amo man ang international humanitarian organizations.
Ini nga development ang ginpakigbahin man ni US Secretary of Defense Lloyd Austin III kay President Ferdinand “Bongbong” Marcos Jr. kadungan sang pagbisita sini sa Pentagon.
Ini nga pagbisita sa Pentagon ang kasunod man sang Trilateral Leaders Summit kahapon sang aga (oras sa Pilipinas) sa tunga nanday President Marcos Jr., US President Biden, kag Japanese Prime Minister Fumio Kishida.#
