Nagdepensa si United States President Joe Biden kasunod sang iya performance sa presidential debate batok kay anay President Donald Trump.
Sa 90 minutos nga debate sa Atlanta, Georgia 9:00 kahapon sang aga (oras sa Pilipinas), talalupangdon nga pila ka beses nga indi na mahangpan ang ginapanghambal sang 81-anyos nga presidente kag nagakalipat pa sang iya isugpon.
Matapos gintawag sang kadam-an nga pigado ang iya performance, gin-athag naman sang iya senior campaign aide nga indi mag-atras sa matchup ang Democrat leader kag magadayon man ini pati sa ikaduha nga presidential debate sa Septyembre.
Sa Raleigh, North Carolina, nag-abot si Biden nga mas may pwersa na ang tingog kag may dala nga mga atake batok kay Trump.
Samtang nagasinggitan ang mga tawo sang “Four More Years” ukon dugang nga termino, ginsiling ni Biden nga indi na siya lamharon kag indi na mahapos para sa iya ang maglakat kag maghambal pati na ang pag-debate.
Apang suno sa presidente, nakahibalo siya kun paano maghambal sang kamatuoran kag nakahibalo siya sang iya trabaho.
“Folks, I don’t walk as easy as I used to. I don’t speak as smoothly as I used to. I don’t debate as well as I used to, but … I know how to tell the truth. I know right from wrong, and I know how to do this job,” pahayag sini samtang nagasinggit ang iya mga tagasuporta. “I know, like millions of Americans know, when you get knocked down, you get back up.”
Sa amo man nga rally, ginpang-pahat-pahat ni Biden ang mga sala nga ginpangwakal ni Trump sa debate kaangot sa ekonomiya, krimen, kag immigration.
Ginsiling sini nga nag-set si Trump sang bag-o nga record sang pinakamataas nga numero sang kabutigan sa isa ka debate. Indi lang ini convicted nga kriminal suno kay Biden kundi isa ka “one-man crime wave.”
“I spent 90 minutes on stage debating a guy with the morals of an alley cat,” suno sa current president. “I think he set a new record for the number of lies told at a debate.”
“Donald Trump isn’t just a convicted felon. Donald Trump is a one-man crime wave,” dugang sini.
