Nagapaninghamot na ang rematch ukon round two sa tunga nanday US President Joe Biden kag anay President Donald Trump sa eleksyon sa pagka-presidente sa Estados Unidos sang Amerika.
Ini matapos ang pagdaog ni Trump sa New Hampshire primary sang ginlutos sini ang nabilin nga challenger nga si Nikki Haley kag nagahilapit nga makuha ang presidential nomination sang Republican Party.
Maragtas ini kay Trump nga amo ang labing-una nga kandidato sa Republicans sa modern era nga indi incumbent apang nagdaog sa Iowa kag New Hampshire Republican contests.
Indi pa tapos ang away para kay Haley bangud nagapreparar man ini sa primary sa iya nadak-an nga state sa South Carolina, apang kun basehan ang maragtas sang Republicans, wala sang kandidato nga nagdaog na sang duha ka imbukada nga contests apang napaslawan pa nga makuha ang nominasyon sang partido.
Para naman sa 81-anyos nga si Biden, tuman na ka klaro nga si Trump ang mangin nominee sang Republicans sa eleksyon sa Nobyembre. May T-shirt na subong nga naga-guluwa sa kampo ni Biden kun sa diin nakasaad: “Together, we will beat Trump. Again.”
Bilog nga kalibutan ang nagalantaw sa eleksyon sa Estados Unidos sang Amerika ilabi na sa gyera nga ginakaulamiran sang mga kaalyado sang Amerika nga Israel kag Ukraine kag mga problema nga nagapalibot sa mga plano ni Trump sa foreign policy lakip na ang posible pagguwa sini sa North Atlantic Treaty Organization (NATO).#
Courtesy: Getty Images via CNBC
