Lain gid ang feeling kun ginatamyaw ikaw sa imo nga birthday.
Espesyal ini nga adlaw nga aton gid gina-selebrar ang aton nga pagkabun-ag diri sa kalibutan.
Didto sa Boston sa Massachusetts, USA, may isa ka lalaki nga naga-selebrar sang iya nga kaadlawan apang wala gid sang nagatamyaw sa iya.
Ini amo si Chris nga nagtapak sa edad nga 25-anyos sa amo nga adlaw.
Bangud naga-isahanon kag bisan tungang-gab-i, nagtawag ini sa emergeny telephone number nga 911 nga ginatawgan lamang kuntani sa tion sang emerhensya. Didto kag nagpanugid siya nga gusto niya nga may magkanta sa iya sang happy birthday.
Abi sang pulis, prank lang ini kag base sa pagsulundan, istrikto gid nga ginadumilian ang amo sini nga mga joke.
Apang wala ini ginbalewala sang mga police officers nga sanday Israel Branco kag Franklin Ortiz. Ginkuha nila ang address ni Chris kag nagpanuktok sa balay sini bisan kagab-ihon pa lamang.
Sang ila na-verify nga kaadlawan matuod sini, ginpaguwa na sang duha ka pulis ang ila dala nga gamay nga cake, ginsindihan ang kandila, kag nagkanta sang happy birthday.
Wala sang kaupod si Chris sang amo nga gab-i apang indi naman matakos ang iya yuhom kag kalipay bangud sa efforts sang pulis. Nagkamustahanay pa sila kag nagpasalamat gid si Chris bangud nga nakumpleto gid ang iya adlaw.
“Everyone has one birthday, so everyone deserves to feel special on that day,” pahayag ni Branco.
Ginsugid man sang isa ka pulis nga nagdala gid sila sang cake bangud nga indi siya makasaho nga magkadto sa balay sang tawo nga wala sang dala. Ginsiling man sini nga ginpadaku siya sang maayo sang iya iloy, kag pat-od nga akigan gid siya sini kun mahibaluan nga nagkadto siya sa tawo nga may birthday apang wala sang dala nga regalo.#
