ILOILO CITY- Nagalaum ang Committee on Infrastructure sang Sangguniang Panlalawigan nga makatambong man ang mga involved ukon ang mga anay Regional Directors sang Department of Public Works and Highways Region 6 sa masunod nga legislative inquiry sa kontrobersyal nga Ungka kag Aganan Flyovers.
Sa interview sang Bombo Radyo kay Iloilo 4th District Board Member Rolando Distura, chairman sang komitiba, iya ginpahayag nga maayo gid kuntani nga kompleto ang mga resource persons bangud kun kulang ang impormasyon nga nagasulod, kulang man ang mangin output.
Suno kay Distura, pinaagi sa pagtambong sang mga resource persons, suno kay Distura, amat-amat nga mahibaluan kun ano ang problema kag mangin solusyon sa depektibo nga Ungka Flyover.
Apang kumpiyansa sa gihapon ang natungdan nga sa palaabuton , makit-an kag mahibaluan kun sa diin ang may sala.
Pabor man si Board Member Distura nga sa Iloilo ipahamtang ang masunod nga legislative inquiry agud nga antes ukon pagkatapos sang pamangkutanay, mahimo pa nga malantaw sang aktwal sang mga opisyal ang Ungka kag Aganan flyovers.
Ginalauman man sang natungdan nga mapaguwa na ang resulta sang geotechnical investigation nga ginpatigayon sang third party consulting firm.
