ILOILO CITY- Ginrekomendar sang Chairman sang Committee on Public Safety and Order sang Sangguniang Panlalawigan ang pagpabaskog pa sang border control kag pagbantay sa ports of entry sa Iloilo kasunod sang tuman ka dako nga volume sang illegal nga druga nga nakumpiska sang otoridad sa mga durugista.
Nahibaluan nga sa Provincial Anti -Drug Abuse Council Meeting nga ginpatigayon kahapon, ginpresentar sang Iloilo Police Provincial Office nga naglab-ot sa 15,000 grams ang narekober nga druga kag tuman ka dako ini sa narekord sang nagligad nga tuig nga yara lang sa 1,500 grams.
Sa interview sang Bombo Radyo kay Iloilo 2nd District Board Member June Mondejar, iya ginpahayag nga isa sa maayo nga himuon amo ang pag-reactivate sang Task Force Puerto sa mga pantalan sa palibot sang probinsya agud mas mabantayan kag maintercept ang nagasulod nga mga kontrabando.
Suno kay Mondejar, kinahanglan nga mapag-on ang kolaborasyon sa tunga sang Philippine National Police, Philippine Drug Enforcement Agency, Philippine Coast Guard kag Philippine Ports Authority agud labi nga mapasangkad ang pwersa batok sa pagsulod sang iligal nga druga sa probinsya.
Gindugang naman ni Mondejar nga sa ila nga bahin, ginabuligan nila ang Iloilo Police Provincial Office paagi sa pagpasar sang resolusyon nga nagahingyo sang budget parasa pagbakal sang dugang nga K9 dogs nga mahimo magamit sang otoridad sa kampanya kontra iligal nga druga.
